尋日北京舉行第七屆金融博覽會，有成千個理財規劃師喺現場幫市民解答疑問。好多人想知道年底股市仲有乜嘢機會，又或者問吓保險、銀行嘅理財計劃。但原來最受歡迎嘅仲係黃金，金飾櫃枱40分鐘已「吉」咗一半。
睇番現場人氣最旺嘅攤位，就係銀行同黃金。有金商展示咗一塊25公斤嘅金塊，仲話邊個可以單手拎得起，就免費贈送！哇，咁筍，係人都試吓喇。有典當行畀人圍到水洩不通，嗰啲千足金飾比出面嘅百貨公司便宜，即刻引市民瘋狂搶購。開展40分鐘，展場嘅金飾櫃枱有一半被掃走。
今年金博會展期四日，大會預計將會有20萬人入場，依家北京市民比以前富貴得多，係人都想知道點樣理財，又或者點樣可以錢滾錢最好。觀乎首日黃金畀人熱烈搶購嘅盛況，金商最好即刻補番啲貨嘞，唔係就賺少好多架。
