孖妹缸湖遊:有驚無險Hallowin

疑似十月股災即將過去,代表孖妹就快擺脫「十月芥菜」嘅苦苦哋心情!加上今日係Halloween(萬聖節),孖妹就約咗兩位股壇孖寶去變身做「金融界的惡魔」,等佢哋嚇嚇各位散戶之餘,兼且預估末季港股會有咩恐怖大事發生?提早幫大家定定驚先!

喺萬聖節,大人會打扮成古靈精怪「鬼樣」去嚇人,而小朋友就會逐家逐戶拍門要糖食,暗號就係「Trick or treat」(給糖吃,不然就搗蛋)。講起暗號呢樣嘢,其實股市都有唔少買賣暗號,不過孖妹只係小散戶,梗係唔知呢啲「金融大鱷」嘅秘密喇!不過,難得今日係Halloween,所以孖妹就搵埋兩位股壇孖寶講吓當年今日嘅金融圈恐怖大事件。

藺:靈獅控股董事總經理藺常念

林:恒豐證券研究部董事林家亨

高妹: 我同祺祺最鍾意喺Halloween扮吸血鬼同埋女巫,然後同一大班朋友仔出去周街嚇人,唔知你哋以前點過萬聖節呢?

 藺: 哈哈,我年紀太大喇,唔玩呢啲嘢,但每年我都會預先喺屋企準備定啲糖果,等啲小朋友來拍門時請佢哋食。記得以前我喺美國讀書時,就曾經喺西式餐廳做過六年企枱,即係侍應呀,但嗰時我都唔覺美國人鍾意喺Halloween嘅時候扮鬼嘅!

 林: 以前我住喺加拿大,嗰邊啲人都幾鍾意喺Halloween狂歡一番!讀大學嘅時候,我就試過同朋友仔着晒「踢死兔」,又化晒妝咁去參加Party,但就無扮啲恐怖鬼樣!

祺祺: 不過點解你哋扮惡魔扮得咁可愛嘅?係喇,上星期尾恒指衝破二萬點,唔通港股已經柳暗花明又一村?抑或年底前仲有可怕嘅壞消息爆出?

 藺: 恒指喺十月四日已經見咗今年低位,十一月恒指會企穩二萬點。另外,現時歐美債務危機叫做暫時喘定,如果再有壞消息爆出,咁就真係可能希臘破產,不過年底前發生機會好微。

 林: 年底前恒指料可企穩二萬點水平,加上十二月就快到,啲基金經理又會粉飾櫥窗,鬥吓邊個輸得較少錢,對港股或多或少都有正面影響,而且市場一早消化晒歐美債務危機,散戶要擔心都係擔心明年個市喇!

新能源股無運行

高妹: 唉!呢個環球股市有唔少「金融大鱷」就好似惡魔一樣,佢哋為咗賺錢真係可以不擇手段o架,所以我都係擔心之後仲有股票板塊會出事!

 藺: 大家唔好掂太陽能股,好似保利協鑫(03800)無得炒架喇!首先中國缺乏內銷市場,其次美國嘅太陽能電池板製造商又要求美國政府要對中國製太陽能產品施加反傾銷稅,負面因素多多,股價好難再次炒上。

 林: 其實大市跌,咩嘢股票板塊都會跌,差在邊啲跌得多,邊啲跌得少。不過我都認為股民現階段唔好買太陽能股,依家歐美經濟已經唔掂,政府已經開始扣減新能源補貼,所以未來呢類股票都無咩好運行。

祺祺: 我嘅炒股經驗唔多,淨係感受過○八年金融海嘯嘅恐怖威力,所以都想問吓究竟環球金融市場發生過邊件事真係令你哋有驚嘅感覺?

 藺: 咁梗係○八年金融海嘯時投行雷曼兄弟執笠喇,呢單嘢嘅後遺症拖到今時今日都未解決到,你見依家歐美債務危機咁嚴重就知喇,嗰次真係比九七年亞洲金融風暴仲大鑊,因為大家講緊成個歐洲體系可能會崩潰,歐豬五國隨時有機會破產,情況都真係令人擔憂。

 林: 我就覺得美國九一一恐怖襲擊最得人驚,因為佢搞到美股連續休市四日,係非戰爭時期首次發生呢類事件,而美股之後復市都仲要跌一成半,呢次事件唔單止影響環球經濟,最重要係美國死咗好多金融界嘅投行精英,呢種無形嘅損失都幾傷架!

全球老千一體化

高妹: 不過部分對沖基金唔止係金融大鱷,簡直就係恐怖分子,撳住搶錢嘅!

 林: 唉,依家簡直就係「全球老千一體化」,有啲跨國金融大集團為咗賺錢,真係可以不擇手段。好似宋鴻兵嗰本書《貨幣戰爭》都有提到一個由Rothschilds(羅特席爾德)家族所領導嘅國際銀行家,佢哋透過策劃同埋資助暗殺、戰爭、經濟蕭條而獲得巨大利潤,總之金錢同政治一定有關係,而且又恐怖又污糟,但散戶就永遠都係任人魚肉!

萬聖節概念股炒唔過

散戶鍾意玩短炒,例如炒窩輪、炒期指、炒業績咁,但原來萬聖節都有一隻股票可能有得炒吓,呢隻就係威發國際(00765)。

睇番資料,威發旗下有四大業務,包括奇趣精品及節日裝飾品、包裝產品、PVC及塑膠原料貿易、玩具產品,聽講外國入口嘅萬聖節飾品就係佢哋做o架喇,不過威發上半年業績轉盈為虧,虧損657萬元,雖然佢維持中期派息,但依家歐美經濟咁差,其生意額一定會受影響,即使聖誕節就快到,但孖妹認為炒味有限,散戶都係唔好亂炒喇!

53%網民冀做「空軍」

近日港股因沽空活動頻繁而顯著波動,而港交所(00388)計劃明年探討「中央股票借貨」可行性,讓散戶有機會更易參與沽空。那你會利用沽空股票而在跌市中分一杯羹嗎?據今期《東方產經》網上民調,截至上周末晚上六時嘅結果顯示,53.7%表示「會」,46.3%表示「不會」。

若有料報畀高妹同祺祺或有嘢問,可電郵money.biz@opg.com.hk

高妹、祺祺

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!