近幾年嘅萬聖節，絲絲都好期待滙豐保險喺中環總行搞嘅巡遊籌款活動，皆因可以見到平時西裝骨骨嘅滙豐員工扮鬼扮馬。不過今年就此情不再，絲絲收到風，因為源自美國嘅「佔領華爾街」行動，喺全球遍地開花，香港呢個國際金融中心又點會走得甩，喺滙豐銀行總行嘅「佔領中環」行動睇怕有排都未玩完，為咗參與者嘅安全，所以決定取消今年總行嘅巡遊。
今年已經係滙豐保險第五年同香港癌症基金會合作，本來都計劃得好好地，但係點知因為示威而「斷纜」。雖然無得喺總行扮鬼扮馬，但唔代表籌款活動會停止，巡遊嘅新計劃路線改咗去對面海嘅尖沙咀，由伊利沙伯醫院出發，滙豐仲提醒員工可以繼續捐款添。
仲記得往年巡遊，有唔少滙豐保險嘅高層粉墨登場，特別係外籍高層，更加悉心裝扮，扮鬼扮馬，以前有已跳槽嘅石湛森，舊年就有集團保險業務主管湯德信；不過隨住湯德信提早退休、好有潛力接棒「扮鬼」嘅梁偉邦又走埋，絲絲都好期待今年會有邊個代表人物撐場，但依家就期望落空。