孖妹缸湖遊:陳彥琳棄炒從煮授你心得

祺祺好鍾意飲靚湯,前兩日陪媽咪去超市揀豬骨嗰陣,巧遇一位靚太,言談間先知佢大有來頭,除咗分別喺華爾街摩根大通、瑞銀(香港)做企業上市(IPO)及購併工作,仲喺名牌法國烹飪學校藍帶,以第一名姿態完成法國傳統佳餚班,依家教人煮嘢食。呢位前賓卡叫陳彥琳(Alvina),即刻介紹畀你哋識,佢炒餸同炒股都甚有心得。

A:陳彥琳 Alvina

祺祺:點解你有ibanker唔做,由投行走入廚房教烹飪?

A:我爸爸經營生意,我由細到大,佢都想我入投行,我一早預計到投行捱更抵夜嘅工作模式,身邊啲朋友都覺得喺iBank做好型,係身份象徵。不過依家丈夫都好支持我辭咗份工,因為兩夫婦喺對家投行做,就算喺屋企開視像會議,對方都要自動消失,而且大家仲要鬥忙,一個星期都冇機會瞓埋同一鋪床。辭職後呢年半,我平時會喺屋企煲湯煮飯,佢開心咗好多,而我又好明白佢喺工作上嘅諗法。

投資切記量力而為

高妹:揸鑊鏟煮飯同投資理財,有咩相似嘅地方?

A:一個廚師係食材嘅管家,要對食材有了解,而理財就係要做金錢嘅管家,亦要了解產品特性。其次係要有計劃,廚師唔係就咁揸鑊鏟就煮到飯,要有時間管理,跟住步驟去做,好似落完油先落鹽,然後再加蝦蟹落去煮;而理財亦要有計劃,諗吓自己短時間內有冇需要資金周轉,如果有就唔應該投資喺會綁死資金嘅產品,否則就係錯配。最後係要明白自己嘅需要,假設蝦仁炒蛋嘅黃金比例係6両蝦、兩匙糖、兩匙鹽,當你病咗,就要食得清淡嘅,調味料唔可以落咁多,成個組合都會唔同;所以我哋要就自己處境砌番個理財組合,如果冇錢就唔好買太大嘅樓,唔想每月供款太多,就唔好借8成,借7成好喇。總之食嘢唔可以貪好味食太多,投資都唔可以貪平狂掃貨,雖然難忍,都要止賺止蝕,機構投資者消息較快,散戶要量力而為。

祺祺:整嘢食有咩咁吸引呢?

A:一班人可以透過食飯交流,但有時我睇到飲食節目鼓吹嘅「豪食」文化,根本喺度糟蹋食物,我希望可以透過烹飪節目及烹飪班,建立正面嘅飲食風氣,依家社會風氣好負面,我希望和諧氣氛可以由家庭延伸到社會。我對傳媒用「煮飯婆」、「黃面婆」形容已婚女性有好深刻嘅體會,現代主婦其實有得揀,有投行老闆叫我返去做,但我選擇繼續照顧家庭,以前返工冇晒自己時間,依家靈活好多,但無論煮食定工作依然係用專業態度。

高妹:你以前返工嘅地點──華爾街及中環都分別被「佔領」,由行內人轉為第三者嘅你點睇呢件事?

A:廚師對食物價格好敏感,呢一兩年食材價格漲得好犀利,好似豬骨幾年前賣10幾蚊斤,依家30幾蚊斤,我好明白基層嘅負擔。不過「佔領」行動未必係要趕走金融界,可能只為發洩情緒,如果趕走銀行界後果會好嚴重。中小企想擴展需要融資,如果借唔到錢或者會令業務倒退,到時裁員後員工冇飯食,又會慳啲使買少啲嘢,舖頭生意又會差啲……造成嘅連鎖反應好嚴重。唔需要分Main Street(小城鎮主街,意指平民百姓)同Wall Street(華爾街,意指富有階層),其實每個行業都有一班不良分子。

祺祺:咁你嘅個人投資組合包括咩產品?

A:我以前做購併工作,收到好多內幕消息,所以自己唔會買股票,依家丈夫仲喺投行做,一樣收到消息,所以主要都係買國債、人民幣同投資物業,呢啲產品比較穩陣。依家仲有咩國家信得過?都係中國。國債嘅利率比銀行高啲,好多人都睇好人民幣會持續升值,又有人估喺人民幣5年會內與一籃子貨幣掛鈎,之後匯價大幅提高。值得留意嘅係人民幣轉換風險,一旦內地政策改變,遇上資金需要,就可唔可以將人民幣一筆過轉為港幣。

睇清招股書至落注

高妹:好多人都話企業嘅招股書信唔過,報表嘅數字經過包裝,係咪真架?

A:抽新股一定要睇招股書,唔可以靠市場消息,除咗要理解企業嘅行業性質,亦要對產品有認識,好似化妝品公司咁,要知道產品喺邊度做,產品係出口定內銷已經好唔同。例如Prada(01913)上市,佢集資後點運用資金,究竟用嚟還債,定係發展內地業務以增加未來發展潛力,已經好唔同。有研究公司專門捉錯處,比較外國上市公司招股書披露資料同實際業務,睇吓當中有冇誤導成分。

祺祺:七年嘅ibanker生涯中,有咩令你最難忘?

A:○七年個市好旺,有個客人想向我當時任職嘅投行買Accumulator(累計認購期權),佢睇唔到個市有回落嘅趨勢,亦覺得投資唔會蝕。但我與同事都覺得呢單交易金額太高,個客仲要係賭自己公司嘅股票,雖然損失大生意,但我哋經客觀分析後都拒絕咗,結果個客嬲嬲哋咁搵過第二間做。後來到咗○八年,個客間公司嘅股價已升到4.9元,我與同事建議佢沽番少少貨做Safety Cash(作安全用途嘅現金),一旦畀人追孖展都可以用嚟補倉。個客覺得股價可以上試5.3元,諗住等到時先賣貨,金融海嘯爆發,結果股價跌到落1.01元,冇上過呢個目標價。

高妹:投行畀人嘅感覺好神秘,其實你哋啲客係點搵o架呢?

A:當上市公司有現金需要,就會主動聯絡投行,有啲客人會想減持股票,不過即使公司有現金周轉需要,我哋都唔一定會建議佢哋即刻減持,好似好多上市公司股價喺○七年都爆升,對於啱啱上市嘅企業,佢哋要對投資者負責,如果大手沽出持有股份絕對唔係好事。我以前負責李寧(02331)減持交易,當時都會考慮市場能否容納減持嘅數量、投資者會有咩反應、對股價表現及客人嘅影響、應該以咩方式喺咩時候去減持。

每逢有大藍籌地產股供股,隨後就會爆發股災?

歐債危機又再急轉直下,港股上周二(18日)大挫近800點,險守18,000點關口,藍籌地產股新世界發展系宣布供股集資逾160億元,數據顯示,每逢大藍籌地產股供股,隨後都會爆發股災,像八七、九七以至○八股災等等,今次你又信不信呢?據今期《東方日報》網上民調截至上周六晚上六點嘅結果顯示,信嘅讀者佔66.3%,剩返33.7%唔信。

陳彥琳(Alvina)小檔案

學歷:曾於美國喬治城大學主修政治及經濟,後來在哥倫比亞大學取得政治學碩士學位

履歷:先後任職於紐約華爾街摩根大通及瑞銀(香港),負責首次公司上市(IPO)及併購業務

飲食成就:於法國巴黎藍帶烹飪學校進修,獲榮譽成績及法國傳統佳餚班第一名

網址:http://alvinacookery.com

若有料報畀高妹同祺祺或有嘢問,可電郵money.biz@opg.com.hk

高妹、祺祺

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!