潮流興飲紅酒，甚至大額投資落靚酒或者酒莊，所以就會衍生出好多副產品。創興銀行、中國銀聯同新電子支付國際有限公司，就合作推出咗全球首張用紅酒做主題嘅「酒韻」銀聯聯營賀禮卡。
呢張賀禮卡就好似現金coupon一樣，持卡人可以享受無地域限制嘅消費，喺中國銀聯全球近400萬家商號刷卡消費。為咗配合賀禮卡面世，美國嘅partner Veraison Holdings Inc. 特別為紅酒愛好者設計全方位智能手機應用程式「Wine World Connect」，可以提升持卡人對美國出品紅酒更深層次嘅體會。
香港人鍾意紅酒，喺○五年至○九年間，香港葡萄酒消耗量上升咗一倍，一年高達3,500萬支，係亞洲之最！加上○八年起香港豁免紅酒關稅，所以成交量多咗。
余絲韻