金融徐筆:市況波動穩守為上

呢排車出車入,無論香港內地,都見到個個都拎住部最新型手機,仲要款款都潮,就知道依家電訊呢行幾咁深入民生!電訊呢行,只要硬件搞掂晒,然後用唔同plan鎖住客戶群,就有穩定嘅收入!

電訊股嚟講,中國移動(00941)梗係冇人唔識啦!集團包攬中國主要城市、農村嘅生意。無論你喺邊,要通訊時都要有部電話打畀人,係咪?集團八月份上客量約577.7萬戶,較七月份增加14%,全年累積上客量達4,361.1萬戶,整體用戶總數增至6.27億戶。至於八月份3G用戶上客量為272.1萬戶,帶動其3G用戶總數達到4,031.8萬戶。

中移防禦力強

集團不斷擴展增值業務,包括無線音樂、手機報、飛信、手機郵箱等等,以及手機遊戲、手機支付、手機閱讀、手機視頻等等。增值業務佔營運收入比重31.2%。呢類增值服務正正係集團成長嘅高速動力!

集團繼續發展自己優勢,優化自己移動數據流量嘅質素,不斷吸引新客戶群。一○年,中移就曾經喺上海世博同廣州亞運會進行2G、3G嘅TD-LTE演示,受到一致好評,睇嚟日後都會穩奪4G市場。

睇番數據,集團市盈率便宜,只有11倍左右,息率有4%,防守性極強,絕對適合依家波濤洶湧嘅市況啦!一於繼續追蹤,出發!

香港大學電子金融服務榮譽助理教授徐燦傑

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!