早排六福集團（00590）公布，許照中由獨立非執董，轉為非執董，身份不再「獨立」，令市場揣測許照中係咪有乜嘢新搞作？據絲絲聽聞，佢上個月中已離開任職多年嘅僑豐金融，市場仲傳佢將「另起爐灶」，正密鑼緊鼓籌備，同六福主要股東兼行政總裁黃偉常領導為首嘅控股公司，合資組成一家名為六福金融服務嘅新公司，全面拓展證券同期貨服務，實行喺依家嘅股市淡市中「扒逆水」！
市傳雙方各佔五成股權，新公司係買現成證券行轉名而成，辦公室會設喺上環新紀元大廈。呢家六福金融服務同上市公司無直接關係，但大家不難發現，好多做開黃金珠寶生意嘅公司都有做埋金融服務，好似周大福珠寶、英皇珠寶同周生生等。咁又係，做黃金珠寶有品牌，知名度好高，對拓展金融服務可謂非常有利。
絲絲打電話向許照中求證係咪「另起爐灶」，佢就支吾以對，不作評論。淡市中搞新證券行，都算「藝高人膽大」。不過，許照中每次轉工都係行業最低潮時，但半年至一年後，個市就生番。所謂危中有機，咪就係咁！
余絲韻