絲絲講場：融創孫宏斌：有苦趁嫩捱

大起大落 再闖高峰

孫總嘅背景可以用作電影橋段，後生嗰時喺聯想集團打滾，之後受牢獄之災，早年發展房地產又再跌低，你話幾咁充滿住傳奇色彩呢！一般人經歷呢啲低潮，睇怕乜嘢意志都冇晒，爬得番起身都非池中物。孫總憑住打不死嘅精神，靠融創東山再起，佢仲話，年輕時倒楣總好過喺老咗先嚟倒楣，後生唔吃啲苦第日點會好呢？

咁孫總點解會揀做地產呢條路？佢話當年出獄之後，覺得I.T.行業日新月異，估計自己都追唔上，所以就進軍地產界，嗰陣因為無錢，於是由地產代理做起，到有錢之後再去開發房地產。佢當年創辦順馳公司，喺○一年到○四年呢幾年間，銷售額就翻咗成10倍，一度直逼內房大佬萬科，不過正因為擴張得太急，順馳之後周轉不靈而跌入資金危機，無奈要賣盤。

孫總話，受到順馳嘅教訓，融創依家唔會再盲目追求規模，首要應該將產品做好，而且要妥善控制管理。絲絲都覺得，成唔成功都係其次，不過孫總嘅精神確係值得唔少人學習！