上市公司「做刁」講求天時、地利、人和，喺逆市下唔理單交易有幾正，股價一樣可以冇反應；但個市好嗰時，舊聞翻炒都可以炒一餐！好似創業板嘅環球數碼（08271）咁樣，尋日就因為一單早喺個幾月前已經完成嘅出售交易，股價竟然炒上七成四，就算公司出埋通告，話不明價格升因，全日埋單計數，仍然有逾六成升幅。
市場究竟炒乜？事緣外國報章出咗篇報道，講美資基金凱雷同馬雲有份投資嘅雲峰基金合作，向環球創意旗下收購內地數碼影院伺服務業務！
老外財經報章上午報話有單大刁，公司下午就出通告話，目前並無收購或變賣要披露，咁究竟搞邊科啊？經紀行就提醒絲絲睇番環球數碼之前嘅公司通告，就知道呢單交易根本係舊聞。環球數碼喺上個月七日宣布交易已完成，透過出售事項，公司實收總代價為3.47億元，可惜當時無乜人留意，嗰日股價更加逆市下滑添！
余絲韻