絲絲講場：滙豐王冬勝高球減壓兼行善
滙豐銀行呢排好多「棘手」嘢，裁減三千職位，加上好多高層辭職，搞到滙豐亞太區行政總裁王冬勝（Peter） 幾乎忙到透唔到氣。尋日銀行有慈善活動，對住一班天真活潑細蚊仔，又可以偷閒揮兩桿，希望Peter可以乘機減吓壓啦﹗
尋日佢哋聯同聯合國兒童基金會，合辦滙豐冠軍賽慈善高爾夫球日啟動儀式，希望透過高球運動同商界聯埋，為貧困小朋友帶嚟普及基礎教育嘅機會。
既然係幫助兒童，個活動又點少得呢班社會未來主人翁呢﹗一班着住唔同民族服裝嘅小朋友，同Peter一齊砌一幅巨型Puzzle，亞洲同全球各國出名嘅地標連結埋一齊，希望可以培育貧窮嘅小朋友，為佢哋開拓視野。
同魏聖美切磋球技
今次活動仲請嚟靚女世界頂尖高球手魏聖美（Michelle Wie）助陣，兩位高球高手難得相遇，Peter趁住活動完咗之後，就同Michelle一齊留喺清水灣鄉村俱樂部齊齊打波，切磋球技。
滙豐唔係第一次幫助小朋友，佢哋過去三年透過世錦賽，籌錢畀中國四川地震重災區攀枝花市，為當地38間學校大約5,000個小朋友提供讀書機會。
余絲韻