絲絲講場：兩千萬金條鎮場做騷
尋日係金銀業貿易場推出人民幣公斤條黃金嘅大日子，為咗隆重其事，貿易場一眾監理事，齊齊打晒傳統嘅金色領呔上陣，非常之耀眼。理事長張德熙話，要show吓公斤條黃金嘅廬山真面目，等大家開開眼界。
涉52塊公斤條 保安嚴密
登登登登！張德熙揭開布幔，幾十塊大金條疊成幾層，金光閃耀，絲絲未瞓醒，都畀啲金條「」醒，絲絲即刻數吓呢堆金條有幾多條，但數極都數唔真。張德熙見絲絲咁迷茫，就開估話一共有52塊公斤條，總共價值人民幣1,800萬大元（逾二千萬港元），即係每塊值34.6萬元人民幣，認真唔講得笑。
呢52塊公斤條咁值錢，所以尋日保安好嚴，公關都着一眾攝記盡快影完相，等保安哥哥可以將呢批黃金護送離開。
交收「生意易」公斤好兆頭
新產品尋日登場係大事，金銀業貿易場嘅成員自然鼎力支持。據講新產品喺朝早八點已開始買賣，不過喺十一點至「補番」上板交收儀式，一眾行員落力喊出收金及交金數量，氣氛激烈，最後有322公斤交收，可算係好開始。
張德熙尋日四萬咁口，話貿易場今次推出人民幣公斤條黃金，係為香港離岸人民幣中心嘅發展作出貢獻，貿易場有此宏願，可喜可賀也。
余絲韻