市場熱線：神華產量有望達標

坊間近期唔少評論轉軚，話今次反彈目標係19,500點，但古勝認為真正阻力應該在19,180點，即係50日線水平。睇番五月初恒指跌穿50日線之後的四次反彈，僅兩次短暫重上50日線樓上，如果今浪能夠升穿並且企穩，後市唔能夠睇得太淡，否則由16,170點開始的反彈，可能只係一次超賣後的修正。

現時入市欠值博率

除咗A股反覆先升後跌再升之外，其他亞洲魚缸全部升一點幾個巴仙相當一致，恒指尾市升夠2%算係最勁，但成交得626億元，期指成交亦得8萬張，到呢個位唔係咁多「勇士」去博，水位唔多就無謂亂嚟。美股期指同歐股繼續升到嘭嘭聲，呢個禮拜係美國企業放榜高峰期，金融大孖沙已打定輸數，好友似乎未驚過。

內地14個城市加首套房按揭息率，100萬貸款月供8,000蚊人仔，對用家嚟講咪話唔乸脷，但內房股保持升勢，祖國係唔係會放水任得你講，總之依家炒股票睇氣氛多過睇消息，水泥股亦係跟住內房股升，呢次魚缸小陽春，二三線股由低位反彈計隨時有五成。

鐵路航運鹹魚翻生

溫州資金鏈斷裂事件聽講已波及祖國好多間上市公司，本港公司亦有遠東宏信（03360）有筆1,700萬人仔「走佬」，而天行（00993）早排都借咗4筆錢出去賺高息，至於冇公布嘅上市公司相信亦唔少。中國信貸（08207）一直話有樓做抵押唔驚走數，但依家錢莊收到柯打要放水畀中小企，佢生意或者會受到影響。

勤+緣（02366）上周五抽高後發盈警，亂咁追股票隨時一身潺，呢輪乜股都升，好難判定係真升定假升，鐵路股同航運股呢輪鹹魚翻生，中國智能交通（01900）尋日狂升近40%，鐵路股炒阿爺注資，鐵道部發債獲政府支持（可以減少利息負擔），而且利息稅減收一半，南車（01766）阿媽獲泵水20億人仔，呢筆錢通常遲啲會用嚟增持南車股權，阿爺咁大力支持，難怪鐵路股咁醒。

呢排最令人煩惱嘅係，睇見股票已由低位反彈咁多，高追驚追寶尾，但睇大市係咁升，唔買又囉囉攣，尤其前排受重創更有陰影，好似兗煤（01171）幾日內由20蚊樓上插到最低13.72元，但呢幾日又拿拿臨重上20.95元，呢隻賣現貨煤為主，所以不嬲係升跌最快嘅煤股。

行業步旺季需求增

論穩定性則肯定係中國神華（01088），公司公布九月份煤炭產量增長19%，銷量則升29%，主要係今年向阿媽買資產嘅貢獻，全年嘅產量有望達標，而發電量亦升超過40%，數據咁靚，隻股尋日即升5.7%，就快收復250日平均線。

上個禮拜內地終於推資源稅，但實施「從價徵收」嘅只係煉鋼用焦煤。煤炭股算係資源股當中較穩健嘅一類，就算需求減少亦唔會差太遠，話晒內地今年仍係鬧電荒，而神華喺煤電一體化方面做得尤其成功。

近期煤價回升，主要係北方煤炭庫存量減少，煤炭供不應求，所以前排中煤（01898）發生煤礦事故後亦好快批准復產，嚟緊天冷好快到煤炭業旺季，煤炭股可以繼續睇好。

古勝