華爾街歷來最大嘅內幕交易案主角、對沖基金經理拉賈拉特南（Raj Rajaratnam）周四畀美國法庭判監11年，成為咗刑期最長嘅內幕交易案犯人，佢律師仲要求被判入位於北卡羅萊納州嘅Butner聯邦懲教所，咁啱得咁蹺，同一個監獄嘅友好可能係人人皆識嘅世紀騙案主角──馬多夫。
五十四歲嘅拉賈拉特南係蓋倫集團創辦人，檢控官指佢包括喺○八年靠高盛董事「通水」，透露巴郡入股高盛消息，合共獲利逾7,200萬美元。早喺今年五月，拉賈拉特南嘅14項串謀同證券欺詐罪名已全部成立，只係等緊法官發落。今次佢同時要繳付1,000萬美元罰款，並被充公5,380萬美元內幕交易利潤。
不過，拉賈拉特南大言不慚竟然話會上訴喎。其實，拉賈拉特南應該覺得自己好好彩，事關佢嘅刑期比檢控官要求最長24.5年刑期少逾一半，如果佢身體健康的話，等到出冊後仍可以大把世界，反觀，精心策劃美國史上最大龐氏騙局嘅馬多夫，佢呃咗500億美元，喺金融海嘯期間東窗事發，最終被判監150年，肯定無緣同刑滿嘅拉賈拉特南喺外邊「敍舊」喇。
無論如何，拉賈拉特南係最受注視嘅「白色衣領」罪行被捕人士，今次判決標誌華府打擊華爾街不當行為上嘅里程碑，警告佢哋政府唔會容忍呢類罪行，必會予以重判。
余絲韻