今屆WFE（國際交易所聯會）喺南非約翰內斯堡舉行，明年將會「風水輪流轉」，係亞洲區嘅世界，其中，大中華區交易所更將會「發圍」。
點解咁講呢？事關明年WFE年會將會由台灣證券交易所主持，已定於明年十月十四至十六日舉行。
計埋港交所（00388）主席夏佳理已經係WFE主席，上海證券交易所理事長耿亮又係WFE董事局成員之一，中港台交易所喺WFE地位與日俱增，已經係不爭嘅事實。
港交所日前喺南非更加宣布，與「金磚市場」包括巴西、俄羅斯、印度、及南非嘅交易所組成聯盟，令各市場嘅股市指數衍生品可以互掛，呢個構思係港交所主動提出，證明港交所有一定「江湖地位」。
不過，聯盟依家其實只係簽了合作框架，好多細節仍要再討論，港交所尋日股價並冇「爆炸性」上升，係咁意升3.8%，可見市場反應比較審慎，聯盟嘅效果仍要拭目以待。
余絲韻