俄鋁（00486）係第一隻嚟香港上市嘅俄國公司，依家仲扮演埋提升兩地文化交流嘅角色。舊年佢哋搞過一個叫《蛻變‧俄羅斯》類似旅遊推介嘅電視特輯，大獲好評，今年一於「食過翻尋味」，推出《香港‧莫斯科：平凡英雄》特輯，通過介紹兩地一共10位慈善家、拯救者、兒科醫生、教師及科學家嘅心路歷程，加深兩地文化嘅交流及認同感。
絲絲尋日睇過「優先場」，分別係描述Tatyana Fedyaeva及羅炎玲兩位教師嘅特輯，前者啟發俄國學生鑽研數學，為俄羅斯嘅科學發展作出貢獻；後者則鼓勵學生學好英文，以便與世界各國溝通，建立屬於自己嘅價值觀。絲絲對羅女士喺片中嘅一句「生命影響生命」特別有感觸，令絲絲亦即時回想起當年教識絲絲好多嘢嘅老師們！
可能俄鋁亦深明「學生是未來」呢句話嘅真意，除咗拍攝特輯外，仲會同香港科技大學合作一個「三部曲」，首部曲就係喺今日舉行嘅「科大俄鋁校長論壇」，由第一個提出金磚四國概念嘅高盛主席Jim O'neill主講，分享其對環球經濟動態。
至於其餘嘅兩部曲，分別係「中俄交換生計劃」同埋「鋁材科研計劃」。絲絲仲八到，俄國學生對於來港留學特別有興趣，但係本港學生似乎對留學俄國有啲抗拒，唔通啲港孩怕凍？
余絲韻