一班工商界專業人士，幾年前開始返北京上國情班，修讀中國國家行政學院為期一周嘅課程，後來就讀人士愈來愈多，於是喺今年成立咗同學會。唔講唔知，同學會將會喺今個月二十七日正式舉行就職典禮，其中一名副主席李細燕就預告當晚會有「神秘」嘉賓節目，大家真係萬勿錯過。
絲絲猛問李細燕究竟神秘節目係乜，會唔會係好似年前有「校長」之稱嘅李福兆「出山」搞「棟篤笑」咁，李細燕就點問都賣關子，只係話到時一定會有驚喜喇！除咗「神秘」節目外，就職典禮當晚自不然請咗好多猛人嚟做嘉賓，中國國家行政學院院長同副院長都會出席，而同學會每一個專業界別亦會有好多嘉賓嚟畀面。
講番同學會成員，本身已是星光熠熠，好似有李嘉誠基金會董事洪小蓮、中銀國際副執行總裁謝湧海等。同學會首任主席係證券業協會前會長李耀新，副主席就包括謝湧海及李細燕等。
國家行政學院屬省部級培訓機構，係研究中央政策嘅基地，唔少高官都喺學院培訓，○八年工商界亦返去學習。成立同學會嘅目的係希望集合一班工商界專業人士，為政策發表意見。
余絲韻