講咗好耐嘅港交所（00388）交易大堂續約，據聞已傾掂晒數，大業主政府非常「克制」，最新嘅租金，每呎呎租100蚊都唔使，加幅一成左右，絲絲以一個字形容，「抵」！
雖然呢排個股市好似食咗瀉藥咁，樓市亦受到影響，但中環甲級商廈呎租，閒閒地都要百幾、二百蚊一呎，所以港交所今次續租嘅租金，都幾「筍」！記得交易大堂○八年十月續約3年時，每呎呎租由約28元，大幅上升到每呎約80元，升幅達1.8倍。但今次續約時，政府加幅卻只有一成左右，仲唔係克制？
交易大堂面積4.5萬方呎，今年十月約滿。雖然交易大堂近年使用率不高，出市又「買少見少」，但交易大堂始終有佢嘅存在價值，尤其係招待領導人參觀，同舉行上市儀式等，交易大堂好有用呢。
但點樣有效利用啲樓面，就要花啲心思。交易大堂早年已曾「大變身」，將出市嘅櫃枱減少，將餘下嘅面積改建為展覽館及直播室等。今次續約後，交易大堂應會再改裝，加多啲直播室，滿足市場需求。
余絲韻