孖妹缸湖遊：醒你簡單撈底秘訣

外圍因素咁惡搞，隨時再拖累恒指大跌，市場普遍估計恒指仲未見底，有啲散戶想撈又唔敢撈，有啲就準備晒錢去撈，但又唔知點撈最安全。其實孖妹覺得，愈危險嘅地方愈安全，有時候愈簡單嘅投資方法，隨時係最實際兼有用都唔定！今期孖妹就搵到兩位證券界新人王傾吓偈，佢哋入行只有三、四年時間，但分享嘅撈底術一啲都唔複雜，實行以「簡單取勝」。

盧：豐盛金融分析員 盧志威

陳：耀才證券市場研究部副經理 陳偉聰

高妹： 歐美債務問題可能愈爆愈大鑊，你哋覺得恒指見底未呢？依家入市撈第一轉定係再靜觀其變呀？

見萬五即入市搶貨

　盧： 未！因為我相信歐債危機最終係搞唔掂，德國未必會出硬招去救希臘；美國問題雖然無歐債咁嚴重，但其經濟唔會好得去邊，再者中央調控政策繼續整死內房股，所以恒指仲未見底，現階段唔建議散戶入市撈貨。依我睇，當恒指跌至16,000點，我會開始撈番啲心水股份，等佢跌到15,000點，我一定會大規模出擊；或者當中央政府決定再向港股「放大水喉」，或樓價大冧20至30%，只要呢兩件事是但一件發生咗，我都會即刻入市搶貨。

　陳： 歐債危機唔會有徹底解決嘅辦法，而美國出口術推「扭曲操作」對救市無咩實際用途，除非佢再推QE3（第三輪量化寬鬆）喇，加上內地嘅通脹問題持續，年底前經濟增長會有放緩空間。即使依家恒指市盈率（PE）同市帳率（PB）都好低，但佢同○八年金融海嘯時比較，兩者之間嘅PE同PB仲有10至20%嘅差距，所以現時啲股票未算最平，散戶喺15,800點或以下撈貨會安全好多。

祺祺： 即係依家要忍手喇！咁我同高妹就耐心等待最靚嘅撈底時機出現喇，但你哋有咩簡單又有用嘅撈底方法預先醒畀我哋先？

亂掃50隻平價股仔

　盧： 撈底首要策略係資源分配，而我會介紹兩種非常簡單又有用嘅撈底法畀大家知道，第一種係撈大跌市下嘅優質股，喺16,000點先用20%資金去入貨，喺15,000點就用30%資金；第二種方法相信好多人都知道，就係投資大師約翰鄧普頓嘅「灰姑娘」式投資法，其投資理論係買入所有市價低於1蚊美元嘅股票，喺一九三九年，只有26歲嘅鄧普頓就用咗1萬蚊美元買咗104隻股票，四年後全部賣出時嘅總值係4萬蚊美元，足足賺咗四倍利潤。當港股見底時，我建議大家可唔理好醜咁買入1蚊至2蚊嘅股票，買30至50隻都無問題！

　陳： 依家環球股市好受政治同政策影響，未必適合散戶大舉入市撈貨。如果大家喺17,000點樓下撈貨，我建議可先用20%資金入市，即係用10%資金買「十二五」國策股，如資源股、水泥股同個別內房股，博其反彈力夠強；另外10%就買風險較低嘅電訊股或者REITS（房地產投資信託基金），如領匯（00823），貪其行業同股價夠穩陣又有利息收。

揀有「護城河」股份

高妹： 嘩！果然係「股壇英雄出少年」，呢啲撈底法聽落去簡單易明，而且又有道理，我諗散戶們真係可以等到港股見底時一試呢幾招喎！不過，早前港股跌得好傷，搞到大戶、基金經理完全唔理股價高低，一於將啲股票全部丟出街，市場上出現唔少洗倉股，好似思捷環球（00330）、雨潤食品（01068）就係最佳例子。

　盧： 有時候揀股票步驟唔使太過複雜，其中簡單方法就係揀有「護城河」保護嘅公司，意思係指無論呢間公司嘅產品或者服務有幾貴，消費者都一定會去買去用，令到其股價唔會咁容易被外圍因素去攻擊。

祺祺： 我聽過「護城河」呢招揀股大法呀，連股神巴菲特都有用o架，佢仲講過：「好品牌唔一定係好公司，好公司唔一定係好股票，好股票唔一定會賺得最耐錢，所以總結就係大家要識得分辨真假嘅『護城河』。」

成交驟增切勿沾手

　陳：大部分洗倉股都唔會跌一日就跌完，當大家見到呢啲股票嘅成交額出現擴大嘅迹象時，通常代表之後仲會有第二輪跌勢，如果散戶想撈洗倉股嘅話，可以等到佢哋跌埋第二輪先至入市，另外亦要謹記重點，就係一定要知道洗倉股急跌嘅原因。

高妹： 洗倉股急跌嘅原因，咪就係因為大戶無理取鬧咁狂沽囉！

　陳： 咁大戶都係基於某啲理由先咁做嘅！好似思捷咁，其問題係受到歐洲經濟前景拖累，以致上半年業績好差，而下半年又見唔到盈利有改善空間；而雨潤嘅問題就出於企業管治，其連串食品安全事件一定會令股價受壓，形成公司前景不明朗。好明顯，呢兩間公司嘅問題並非短線可以解決，即使散戶撈咗貨都未必會有錢賺，所以我唔建議去撈呢兩隻股票。

祺祺： 哈哈！總之唔理「黑貓定白貓，捉到老鼠嘅就係好貓喇」！炒股都係一樣，有時候簡簡單單咁炒，分分鐘會有意外驚喜添。

現時你敢撈港股嗎？

上周一（26/9）恒指一度跌穿17,000點大關，翌日即出現報復性反彈，重上18,000點。在港股估值不高，但股破投資者信心薄弱下，現時你敢撈港股嗎？據今期《東方產經》網上民調，截至上周末晚上六時嘅結果顯示，47.7表示「敢」，52.3表示「不敢」。

若有料報畀高妹同祺祺或有嘢問，可電郵money.biz@opg.com.hk

高妹、祺祺