市場熱線：低處未算低無謂博

空軍見歐債危機紓緩，轉而空襲大陸，狂炒中國CDS急升，人仔貶值，鬼佬分析員唱淡中國GDP喺五年內會跌到5%以下，老美亦有動作配合，調查中資股盤數，全方位一齊發功做你世界，咁啱溫州又告急，中資股唔死一身孱。

滙豐公布嘅九月份中國PMI係49.9，同八月持平應該收貨，但班鬼佬分析員雞蛋裏挑骨頭，話連續三個月收縮，幫空軍搵藉口。不過，禮拜六祖國自己嘅PMI則回升到51.2，唔知班分析員仲會唔會話中國經濟硬着陸呢？

危機風眼逐漸東移

溫州老闆集體走佬事件上晒頭版，但前排走咗佬嘅眼鏡大王竟然走返轉頭講數搞重組。今次爆發點又係溫州，政府要求錢莊唔好逼債仔還錢兼要減息，即係搵錢莊做犧牲品啫，所以上周五內銀股狂冧亦有道理。唔止外資要班資回朝，連阿爺都要套錢救駕，溫州民間資本投資中心就由香港調撥2億返去救市，外資中資個個沽，香港不愧係「提款機」。

人仔上周五先創新高、再跌停板，但人仔貶值可能只係長假前夕效應，唔使驚得太早。美匯指數上到78.8，兌其他貨幣都偏強，所以睇落人仔亦有貶值空間，不過，阿爺喺九七亞洲金融風暴期間亦冇畀人仔貶值過，古勝懷疑只係空軍嚇鬼橋段。獨有一種貨幣兌美金不跌反升，邊樣？港紙也！過往股匯齊跌係例牌菜，今次點解會反常要留番畀外匯佬去解釋。

打風休咗日市，好友諗住逃過一劫，點知上周五仲大鑊，恒指跌418點，國指跟住ADR大洗倉瀉3.88%，內房、內銀、水泥、濠賭、零售全部係重災區，跌市成交增至超過900億元，更令人眼凸嘅係沽空達127億元，佔大市成交14%，創十二年來新高，空軍咁狼顯然覺得仲有水位。依家恒指無位可守，只有寄望每跌500、1,000點會有人支持，但班「趁低吸納」股民已且戰且退潰不成軍。

空軍要搵食話咁易

踏入十月，美國企業又公布季度成績表，美股一路跌得少，今次有機會補跌。祖國移動（00941）、國壽（02628）同友邦（01299）仍係托市三雄，跌市奇葩仍係青啤（00168）、粵投（00270）呢類；天宮一號成功升天，中航科工（02357）同中航工業（00232）亦飛得起，但後者只係尾市挾上。

受超大（00682）連累，亞果（00073）大跌27%，另一農業股中綠（00904）亦流血不止。不過，份「匿名報告」質疑亞果但完全冇point，可見提吓個名已可置你於死地，唔怪得之空軍有恃無恐。

國美（00493）兩日暴瀉三成，雖然話不務正業啫，但涉及房地產金額得1億幾人仔，不過呢兩日市值就唔見咗136億元，可謂因小失大。國美今年預測PE得10倍左右，簡直係大平賣。專業旅運（01235）睇落細細粒容易食，點知骾親，成為今年首日表現最差新股。罕王（03788）雖然算跌得少，但睇見鋼鐵股嘅頹勢，後市都唔使睇。

古勝