絲絲講場：星展員工培訓 鼓勵關心社會
星展嘅銀行財資同市場業務今年成績唔錯，預期全年大中華區整體嘅財資及市場業務可錄得超過兩成增長。業務有增長，梗係要獎勵員工，但星展亦不忘進一步加強培訓，新加坡總部嘅集團財資及市場業務總監伍維洪上個禮拜尾帶咗中港台嘅團隊，一行百五人喺香港進行咗一日團隊訓練。
今次個活動完全實踐到星展積極支持社會企業可持續發展嘅理念，年宵嘅時候星展都有資助好多後生仔喺維園做生意。今次星展邀請咗社會組織「黑暗中對話」（Dialogue-in-the-dark）同埋「無聲對話」（Dialogue-in-silence）舉辦工作坊；工作坊亦都係佢哋有史以來喺香港舉辦過最勁嘅一個添！
黑暗/無聲環境訓練
絲絲聽聞個工作坊好有創意，例如你有無試過喺黑晒同無聲嘅環境接受挑戰呀? 話要畀員工訓練信任同埋希望大家互相協助。總監梁德立話好多謝「黑暗中對話」同埋「無聲對話」，鼓勵啲同事專注工作同企業盈利之餘，要多啲關心社會喎。