大市喪跌，影響各行各業，除咗中環高級食府之外，財經高手開壇搞研討會，捧場客亦大減，個個嚟捧場都無不愁眉苦臉，氣氛都咪話唔沉重！
絲絲最近同輪商傾開偈，佢哋大呻近排舉行嘅窩輪研討會，入場人數對比○七年高峰期，足足少咗九成咁多，同舊年比較，亦只係舊年參與人數嘅三分一。總之一句講晒，「災情嚴重」！
佢哋話，呢啲投資研討會一早已安排晒，又book晒場地，所以遇上股市急插，仍要繼續舉行。
佢哋形容，嚟到嘅捧場客個個都滿懷心事，估計呢鋪大市咁跌落嚟，輪場客輸得好傷。佢哋依家最想問嘅係點樣可以幫佢哋解決難題，喺跌市中不用輸錢。
大家都知啦，輪場客鍾意買call輪多過買put輪，升市就話賺錢啫，跌市就可能要蝕入肉了。的而且確，要喺輪場跌市中仍可賺到錢，技術係要高班啲。
絲絲就學吓證監會幾日就向投資者預警一次，奉勸大家喺輪場見勢色不對，最緊要「快閃」。
余絲韻