市場熱線：市況未明宜靠邊站

近期市況波動到離晒譜，八、九月賭升賭跌的對沖基金，據知唔少輸到嘔，近兩星期已奉行少做少錯策略，做塘邊鶴企埋一邊。尋日缸邊消息話，有個以長線投資馳名的長倉基金，亦終於都按捺不住，清貨大平賣狂隊幾隻內保及內銀股，而尋日收市後，據聞亦有幾個長倉基金要同歐洲及北美總部開會，商量對策。睇怕縱使大市未到終極一跌，都已經相當接近短期低位，古勝惟有希望第三季插夠之後，第四季港股可以休養生息。

尋日恒指有祖國移動（00941）、大笨象（00005）同公用股等頂住，仍未算好樣衰，但國指尋日大插近300點或3.3%，二三線股更加唔使講。恒指跑贏國企同二三線股，而全球主要股市則跑贏恒指，買二三線股嘅散戶早就經歷股災。港股一慘在對好消息冇反應，二慘在成為提款機，尋朝標普期指仍然炒緊歐央行放水嘅消息保持升勢，但港股已經冇運行，大戶要沽貨都唔使講理由。

仍等待終極一跌

依家溫水煮蛙，不如早跌早着，等待終極一跌，通常連強勢股都被洗倉嘅時候，個市亦會差唔多見底，但祖國移動回吐兩日之後又再度企硬，雖然公用股不嬲係逆市奇葩，但當港股整體PE跌到得幾倍嘅時候，公用股亦難以獨善其身，依家連穩陣收息股好似領匯（00823）、越房（00405）都難逃一跌，最佳避風港就係揸現金。

連金價泡沫都爆埋，依家得美債泡沫唔知頂到幾時，十年期美國國債孳息得1厘7，又係遲早爆煲嘅格局。金呢樣嘢可以好值錢，亦可以一文不值，早排大升時有人拍心口必過2,000美金，但每樣嘢一升過龍就大鑊。家陣風頭火勢乜都有人炒，南韓CDS亦急升，但南韓若國家有難，至少國民會捐軀，但希臘呢？

本來唔少人睇月尾會彈一彈，不過尋日跌到連信心都冇埋，港股收市後，IMF亦話加碼放水，DAX升百幾點，標普期指亦倒升10點，港股今日又會憧憬反彈，但購買力已愈來愈弱，假若高開之後係沽貨定追貨？單日市況已經咁難估，下個月更要見步行步。古勝建議睇埋呢幾日，月尾無論升跌，下月初可以短線反方向操作。

食品股榮辱互見

滬綜指尋日亦卒之跌穿2,400點大關，恒指乘機質穿萬七關，好似特登製造恐慌，但查實得26隻牛打靶，尋日資金仍係流入牛證為主。而恒指尾市雖然由低位回升400點，但下跌股數仍接近1,200隻，好多二三線股尾市反而插深咗，鐘錶珠寶股跌幅擴大到15%，喺「十‧一」前夕先至大屠殺。內房股尋日升多半日已冇貨賣，埋單得兩隻龍頭中國海外（00688）同潤地（01109）微升保得住齋缽，恒大（03333）亦跌8.8%。

雨潤（01068）自我引爆暴瀉三成，照計冇乜必要發盈警，而隻股一路唔見大股東增持或公司回購，反而見管理層急急腳行使購股權又即刻喺市場沽埋，真係明買明賣得交關。超大（00682）有報道畀人查，下晝急急拉閘，如果屬實，民企股死多兩錢重。

食品股個別發展，雨潤同超大壯烈犧牲，但台資嗰3間就相當硬淨，中糧（00606）再跌近一成，呢排「黑心油」事件搞到人人都驚，大牌子嘅食用油生意應該得益，不過呢排個市已係非理性，所以應該暫避風頭，等孖屐冷靜過後或出現終極一跌至好中長線買貨，短炒則睇3點有冇high tea，到第二日即可食早餐。

古勝