喺金融界同政壇都有相當名氣嘅馮家彬，突然宣布辭任昊天能源（00474）副主席兼執行董事等嘅全職職務，連佢個女馮穎琪亦都辭任公司嘅非執行董事職務。雖然辭晒喺昊天能源重要嘅職務，不過馮家彬仍然會擔任公司嘅顧問，為商業投資組合運作繼續服務。
馮家彬係股壇前輩，八十後未必識，但喺金融圈玩得十年八年嘅人，對佢應該唔陌生。佢除咗係已故證券大王馮景禧得力助手外，亦係金匯國際嘅創辦人兼主席，同埋金匯投資嘅主要股東，喺金融、證券及商品交易同埋企業財務方面擁有豐富經驗，絕對稱得上喺老行尊。身為自由黨常委嘅馮家彬，喺政壇亦相當具號召力，舊年低調娶新抱，亦獲得一眾黨友空群出動飲喜酒，場面真係星光熠熠。
至於馮家彬嘅千金馮穎琪，就因為想投入更多時間喺個人或其他業務事項上，而喺同日辭職。可能大家對洋名叫Vicky嘅馮穎琪，喺商界嘅戰績有啲陌生，但喺樂壇都有名氣o架，好多樂壇天王天后都唱過佢嘅作品。Vicky本身擅長唱歌、作曲同填詞，喺呢方面嘅經驗已經有十幾年，作品好多。唔知佢今次辭職之後，會唔會有更多嘅佳作推出呢？
余絲韻