市場熱線：中信電訊見承接力

尋日港股高高低低chok到暈陀陀，高開5分鐘已冇料到，到10點半係最恐慌時刻，個市跌唔夠200點，但二三線股跌到慘不忍睹，然後又倒升、又倒跌，食粥食飯都係睇3點鐘，歐洲魚缸竟然不跌反升，跟住嘅古仔唔使多講。市況波動亦帶動成交增至638億元，亞洲魚缸個別發展，A股微升擺脫上日低位。

零售股終難逃一洗

中資電訊股撐起大市，恒指境況已好過二三線股好多，皆因有3隻公用股同兩隻電訊股頂住，又不時將弱勢股踢出局換入強勢股，所以散戶慘況唔可以用恒指嚟衡量，尋日升市但仍係下跌股數佔多，又係唔少板塊被洗倉，水泥股有反彈但中建材（03323）獨憔悴創埋新低，太陽能股冇晒光芒，零售股喺黃金周前夕至洗太平地，JOYCE（00647）插9.3%，周生生（00116）跌8%。

中信證券招股前夕，幾隻證券股跌到一仆一碌，但見魚缸一池死水，證券股冇運行亦屬正常。繼徐工之後，三一重工都話要押後招股，中聯重科（01157）同三一國際（00631）少不免陪跌，可見新股氣氛冷淡。其實呢輪弱勢股好明顯係內房、建築同建材相關股，雖然樓價跌幅未算明顯，但孖屐已預計呢次祖國樓市會遇嚴冬。

蘋果公司股價創413蚊美金新高，市值媲美新興市場GDP，一眾電訊股、電訊設備股同OEM股都齊升慶賀，但華寶（00336）連升5日，呢期數佢最威。呢隻不嬲係基金股，有時基金會埋堆集中火力揀幾隻股粉飾櫥窗，之前係水泥股、金飾珠寶股，呢輪係電訊股、燃氣股，總之唔同空軍各有目標，河水不犯井水。

古勝今日亦揀電訊股，但係揀較為冷門嘅中信國際電訊（01883），呢隻同「哎瘋」更冇關係，但公司股價自八月初見底之後，無論每次高位同每次低位都係向上提升，皆因佢半年成績表令人意外賺多30%，所以孖屐對佢另眼相看提高佢嘅估值。

積極發展提升收益

呢隻不嬲係被人忽視嘅股，因為靠話音同短訊服務唔慌有乜增長，依家靠互聯網已取代咗好多電話功能。但公司亦積極發展其他業務，包括互聯網虛擬專用網絡同雲計算等產品，而新收購嘅澳門電訊20%股權亦提供穩定貢獻。

中信電訊上半年各項業務都有增長，話音、短訊同其他電訊服務收費分別上升17%、11%同14%，現價往績PE唔夠10倍，如果全年亦賺多三成嘅話，PE降到7倍，依家周街都係平貨，但呢隻勝在穩穩陣陣，○九同一○年盈利增長分別得12%同8%，被人視為低增長股，但今年中期成績表交到功課，現價支持力應該唔錯。

古勝