絲絲知道近年中環OL們興打泰拳keep fit，唔知係咪工作壓力大，有女賓卡（Banker）決定親身出戰「打擂台」。大家咪以為女仔打拳就一定「姐手姐腳」，有啲經過嚴格訓練嘅「拳手」，真係好打到你唔信。
絲絲講緊嘅係已進入第5屆嘅Hedge Fund Fight Nite。聽講近年喺中環好hit，好多賓卡公餘都有操拳去參加呢個賽事；而佢今年仲首次增設女子項目，成為今年十月二十日舉行嘅6場賽事中嘅其中一場。據講，呢12個男女「拳手」會喺今個月二十日中午，齊集中環交易廣場嘅銅牛像前，騷一下苦練嘅成果，有興趣嘅中環人，不妨當日去圍觀造勢。
絲絲早輪都曾經試過去上堂兼舒展吓筋骨，但講到去「打擂台」，絲絲就真係自認細膽兼怕痛，從來無試過亦唔敢諗！
余絲韻