絲絲講場：黃錦康睇升 樓價唔反口
樓市浮浮沉沉，唔少分析員對後市睇淡，紛紛修改對樓價嘅預測，但美聯集團副主席兼董事總經理黃錦康，好堅定咁話唔會修訂，維持全年樓價升11%嘅預測。
成就獲國務院肯定
佢近日成為國務院《華商功勛》之「風雲人物──中國榜樣」首名，尋日搞咗個新聞界簽書會，絲絲梗係去捧場。喺會上，佢提到自己大學畢業做咗十年記者，有做傳媒嘅使命感，知道每一次分析、預測都會影響好多港人，所以每次開腔之前都會做好多資料搜集同數據分析。
佢話講嘢一定要講事實，唔會好似某啲分析員或者基金咁，低位回穩仲同人講有得跌，等震倉入貨；高位見頂仲繼續唱好，方便自己出貨。佢笑住咁講，佢嘅心意唔止老闆黃建業睇到，連國務院都畀佢一個肯定。
對於十月新一份施政報告，或提出復建居屋，黃錦康話如果數量適宜，唔會對個市有太大影響，但就無表態支唔支持。
余絲韻