中國人社會一向着重「意頭」，特別係生意人，就更加在意。台資天福茗茶（06868）嚟香港上市，做咗個「創舉」，佢地捐錢攞咗個靚老冧，仲要砌到新股每手入場費同老冧一樣係「6868」元，真係襯到冇得頂。
根據遊戲規則，新上市公司自己揀個靚冧巴，就要捐一百萬元，如果由港交所（00388）畀幾個冧巴你揀，可捐少啲，如果完全任由港交所安排，就完全唔使捐添。天福個冧把咁靚，絲絲估公司要捐夠百萬元，冇所謂啦，佢地集資超個十億元，百萬元小數目啦！最緊要個冧巴帶到好運畀大家。
天茗「最玩嘢」係連入場費都砌到同個上市編號一模一樣，呢個難度幾高噃！你知啦，依家個市咁波動，要定到一個又要合乎公司集資額要求，又要啱投資者胃口嘅價錢，真係幾考起，呢條橋係邊個度出嚟？
余絲韻