絲絲講場：花旗慰勞員工費心思
企業要留得住員工嘅心，淨係份人工唔夠，老闆要做啲窩心嘅嘢，老土兼骨痹都唔怕，有啲企業已經有生日假、男士侍產假，真係好幸福，絲絲聽聞花旗最近出咗啲好體貼班員工嘅行動——「員工感謝日」，仲整咗批好靚嘅咖啡杯，由班管理層親自送畀班同事。
花旗咁識錫住班員工，真係好值得其他老闆學習。絲絲收到風，話班管理層好似花旗銀行環球個人銀行服務行政總裁及總經理盧韋柏（Weber）、花旗集團香港區資本市場及企業銀行業務總裁麥永森（Alvin）等一齊同班同事慶祝，多謝班同事咁辛苦，真係羨慕死隔籬啦。
定期活動優惠多
花旗今年特別透過電腦，一連五日透過電腦螢幕，以唔同嘅語言多謝班勞苦功高嘅同事，最正係每個月都會向班員工提供唔同嘅活動及優惠，例如「水果日」、其他餐飲或者旅遊優惠等，唔知佢哋假期多唔多呢，如果多咪可以個個月去旅行歎吓。
余絲韻