尋日（周一）係中秋節正日，好多金融界人士都請咗假去「疏乎」，瑞銀亞洲股票衍生產品銷售部董事總經理于正人今個中秋亦過得好特別，簡直可以用「大豐收」嚟形容。
何解呢？話說每逢大時大節，佢都收到唔少客戶同合作夥伴送嚟嘅應節禮品，今個中秋節亦不在話下，最傳統嘅賀節禮物包括月餅或生果籃，但較為特別嘅係佢今年收咗兩份「大禮」……不要誤會，佢只係收咗兩份心意特濃嘅小禮物。
一份係佢個客自家製嘅月餅，一份就係來自元朗有機農場嘅有機瓜菜。
佢話呢個客已經係連續3年自製月餅。絲絲未親手做過月餅，但就做過蛋糕，過程一啲都唔簡單，可以想像，自家製月餅真係要成副心機去做。呢個客咁有心，都可算係佢嘅超級fans喇。
于正人講笑話，呢排市況難搵錢，都咁有心做月餅好難得，絲絲非常同意，簡直係超有heart喇。
講番個市，近期chok上chok落，輪證市場成交多咗，但賺錢唔易。于正人亦坦言，個市反彈吓又會跌番，反覆橫行。絲絲奉勸各位輪場散戶，最緊要識走位，一唔對路就要「閃」。
余絲韻