絲絲講場：滙豐保險高層地震
滙豐香港區又裁員又換總裁，滙豐入面嘅人真係有得震冇得瞓，唔好以為地震帶只係零售銀行，原來滙豐保險亦同樣發生高層大地震，仲要一走就兩件，「舵主」湯德信（David Fried）提早退休，離任集團保險業務主管一職；香港區嘅阿頭梁偉邦（Robert Lang）上任唔夠一年，亦辭去香港保險業務董事總經理職務，返老家繼續打拚。
湯德信提早10年退休
David今次提早退休真係提得好早喎，佢依家至50歲，正值壯年，距離60歲退休年齡差10年；加上David貴為滙豐集團總經理，又常駐香港，今次提早退休，自然令人聯想到會唔會同裁員有關。
至於Robert，有老友同絲絲講，雖然幾個月前就傳出Robert有意離開滙豐，只不過係未搵到人接任，惟有捱義氣頂住先。
梁偉邦唔夠一年離職
絲絲對呢個說法有啲保留，你諗吓，Robert舊年年尾先加入滙豐，「幾個月前」就傳出計劃離任，咪差不多一上任就想走？
滙豐呢一年嘅人事變動頻繁，老友都慨嘆，依家滙豐正值多事之秋，「咁岩」兩位高層又適時離職，群龍無首下難免會人心惶惶。
其實上半年滙豐保險嘅成績唔曳，絲絲相信兩人離職唔關業務表現事。不過有小道消息講，年初時佢哋見喺香港嘅首季銷售成績大躍進，滿心歡喜覺得市場一哥個位十拿九穩，點知最後僅輸個馬鼻做咗二哥，一早預備好嘅「攞彩」新聞稿都要收起。
余絲韻