中央證券董事總經理鍾絳虹平時工作忙到飛起，無乜時間行街shopping，但女士梗係貪靚o架喇，咁啱中高檔女裝鞋生產商鴻國國際（01028）尋日進行投資者推介搞鞋show，佢當然好有興趣，忙裏偷閒抽咗一個中午去睇show。
佢話個show雖然只有十分鐘，但都不惜工本，仲請到明星高圓圓做代言人，鍾絳虹仲大讚高圓圓靚女，個show配合埋音樂燈光，搞得有聲有色。
講番啲鞋款，唔知鍾絳虹有冇心水呢？佢話啲鞋款都幾七彩繽紛，但亦有一啲款適合佢呢啲OL（白領一族）。事實上，聽聞公司賣得最好嘅鞋款都以平實型為主，方便白領返工。
鍾絳虹仲話，公司旗下有多個牌子，其中一個「起家」嘅牌子名字好有詩意，牌子名叫「千百度」。
點解咁講？據管理層話，牌子名係源自「眾裏尋他千百度，驀然回首，那人卻在燈火欄柵處」呢句名句，果然好有詩意喎！鍾絳虹工作營營役役，偶然去吓呢啲場合，果然別有一番意境！
余絲韻