受原材料及人工成本上漲的拖累，幾隻內地食品股今年上半年都冇好日子過，統一（00220）期內更因受塑化劑事件打擊，中期純利倒退達四成，毛利率大跌6.2個百分點；同業旺旺（00151）中期盈利雖仍升3%，但毛利率亦跌5.1個百分點；至於康師傅（00322），表面上好似最好景，中期盈利升16%，但撇除期內一筆3,900萬美元的出售收益後，業績其實無甚增長，毛利率也倒退了4.9個百分點。
在今年三月時，康師傅曾經宣稱要將旗下產品加價，但結果卻被當局以「大局為重」勸喻而撤回，捱完義氣，若然通脹真係回落，重提加價應該唔會再被托手㬹。另一方面，九月打後，內地將步入假期季節消費旺季，對副食品同飲品需求亦可望有支持。
當然，是否可以提價，現時都係估估吓，而康師傅現價市盈率仲有成34倍，亦都完全唔係平，即使行業環境有好轉，都只可以作為短炒藉口，博中線反彈，就仲係言之尚早。
詩詩