亞太區百萬富翁數目喺二○一○年第一次超過歐洲，為咗食住條水，專門服侍呢班有錢佬嘅私人銀行，有乜辦法唔用錢，利誘人才加入，壯大喺亞太區嘅團隊規模！據聞，部分喺亞太區搵食嘅Banker，賺得仲多過喺瑞士打躉嘅老細。
有獵頭公司就話，喺區內挖一個私人銀行家過檔，閒閒地都要出高20至30%嘅人工。有調查話，瑞銀增加咗300人令到團隊去到1,200人，摩根大通喺舊年亦都將專門照顧投資資產高達3,000萬美元嘅私人銀行家增加到140人，而滙豐喺過去三年將新加坡嘅私人銀行家增加21%去到450人。
間間銀行都搶人，令到呢班成功嘅私人銀行家每人最少有兩份聘請合約喺手，真係可以慢慢揀。獵頭公司話，呢班資深嘅私人銀行家每年喺新加坡嘅人工介乎16萬至41萬美元，但喺瑞士只得15.2萬至21萬美元，更分分鐘多過佢哋喺瑞士嘅上司，真係出手少啲都未必請得郁佢哋。
銀行出得呢個人工，當然希望私人銀行家可以帶埋班客過檔啦，不過唔係咁易，有調查更話喺新加坡同香港只有25%嘅私人銀行家，成功將超過60%嘅管理資產由舊僱主帶去新僱主。
余絲韻