絲絲講場：渣打崔晸圭派早餐打關係
中國大陸係全球增長火車頭，愈來愈多外籍人士進駐內地工作。
來自泡菜國（韓國）嘅渣打中國個人銀行總裁崔晸圭（Jungkiu）都係其中一員。不諳普通話但識寫1,800個中文字嘅Jungkiu，為咗盡快同啲同事打成一片，先為分行嘅同事準備早餐，再開埋個人微博，拉近與同事之間嘅距離。
望一年巡足72網點
Jungkiu六月由新加坡調任到上海，至今只有十星期，已向分行同事派咗17次早餐同埋4次下午茶，佢希望喺明年六月之前能夠巡視所有網點一次，依家渣打喺內地網點總共有72個。受寵若驚嘅同事們亦好識做，送咗個迷你Jungkiu畀佢，仲話Jungkiu係劉備添。
唔多識講普通話嘅Jungkiu，原來小時候學過中文，識寫又識解。講起語文，唔知大家識唔識讀Jungkiu個中文名「晸圭」呢？根據中大嘅粵語審音配詞字庫，「晸」音節為zing2，粵音為「整」，至於「圭」嘅音節為gwai1，粵音為「歸」。
麻辣火鍋No Problem
嗜辣係韓國人嘅喜好，Jungkiu嚟到中國就鍾意食同樣夠辣嘅四川火鍋。杯中物亦難唔倒佢，Jungkiu話自己飲到56度嘅水井坊呢。
余絲韻