市場熱線：盈德低位有支持

連大笨象（00005）都要瘦身，美國要壓長息，美債冇肉食，歐債又危險，錢莊賺錢艱難，所以惟有裁員。國壽（02628）尋日3點半出現天文怪象，新鴻基證券突然蜂擁喺18.82元掛牌買入，結果新證全日買咗80球、聞說沽番大部分出街，究竟買盤涉及大戶買貨抑或補倉就不得而知。全日交投仍然淡靜，得642億元，沽空金額減少到54億元。

食品股要提高警覺

百麗（01880）大股東骨水，股價大跌8.5%；雨潤（01068）管理層低價沽股未及澄清，尋日又傳有瘦肉精，股價暴瀉16%創新低，其實雨潤以前亦試過有瘦肉精事件，但公司自行引爆兼迅速處理。依家危機處理非常重要，味千（00538）前排搞到一身蟻，家下做淡易過唱好，尤其食品股最容易「中招」，呢排食品股沽空比重極高，各位亦宜小心。

祖國話扶持新材料產業，中國稀土（00769）大升13.4%，古勝尋日叫睇住嗰隻天工（00826）亦升8.33%。不過，另一國策減排節能方案就未見炒起，一來已炒咗咁多年，二來範圍太大，唔似稀土概念咁樣集中喺一隻身上。

財技玩法層出不窮，台泥（01136）玩高一半溢價供優先股亦夠新鮮，除高溢價外兼優先股冇上市，散戶肯定供唔過，即係大股東孭上身變相高價增持，做乜咁益街坊？財技有一種係貴買貴賣，但台泥新收購嘅「賽德」同「科華」唔屬於關連人士。古勝一向唔相信股票市場有益街坊呢樣嘢，所以慣咗樣樣都係「陰謀論」。

呢排強勢股數來數去仍係得燃氣股，尋日北控（00392）、新奧（02688）都升4%，淨係中燃（00384）有回吐。燃氣股要靠霸地盤，北控上半年賺多6%，原因係天氣唔夠凍，燃氣、煤炭同波司登（03998）都係望愈凍愈好，但天氣係點冇人知。

簽新項目確保增長

盈德氣體（02168）亦係一隻好股，但供應嘅唔係天然氣，而係工業用嘅氧氣、氮氣同氬氣，上半年賺多51%，原因係舊年尾向神華阿媽供氣，今年上半年再簽11個新項目，截至今年中共有31個營運項目，另有23個新建當中，到一三年氧氣總裝機容量將達每小時148.2萬標準立方米。

盈德上月中派成績表後曾升到最高8.68元，個市唔就兼升得太多有回吐，股價低見7.5元，呢個位係3次回調不破再反彈，尋日收報8蚊。往績PE約21倍，今年PE會降到約12倍。間公司係「現場服務」性質，即係佢間廠亦喺客戶間廠隔籬，所以唔驚對手搶生意，以新項目增長速度嚟睇，前景仍然值得睇好。

古勝