酷6、土豆及優酷等內地視頻網站，經已攞到美國綠卡，去咗美國上市，搞到科網板塊熱鬧咗。好多人誤以為，內地網上視頻嘅版權問題係一片混亂，查實電視劇嘅網上播放權絕對係有價有市，平均計數每集賣成過百萬元（人民幣‧下同）亦不足為奇。
唔好以為呢啲電視劇只係所謂「海盜版」嘅侵權產品，隨着制度開始完善，視頻網站係要真金白銀購買播放權。以早前重拍嘅《還珠格格》為例，搜狐據說就以3,000萬元購入全套98集嘅獨家播放權，近日據傳又以每集100萬元嘅破紀錄作價，購入另一套劇集《浮沉》嘅30集網上播放權。相比幾年前網上播放權每集最多幾百元，絕對係升值好幾千倍，而網站願意高價購入內容，當然是看準當中帶來嘅內容收入及廣告商機。
講開網上多媒體內容，絲絲記得城市電訊（01137）嘅王維基，早前公布以6億港元大力拓展多媒體內容業務，仲講明「網劇」是佢其中一項主打內容，內地「網劇」嘅播放權被炒高，王維基要為新投資打響算盤相信亦更有把握！
余絲韻