絲絲講場：滙豐開班教人幣知識
人民幣邁向國際化，涉及好多商機，但涉及更多嘅，係技術問題，就算日日睇財經新聞嘅，都未必識。滙豐銀行尋日搵專人好似教書咁，透過視像會議教咗好多基本功。
滙豐派出嘅代表雖然未至於係最高級，但都係人民幣相關業務嘅主管級人馬，較為港人熟悉嘅，應該係iBond登場時「曝過光」嘅環球資本市場亞太區副主管兼香港區交易主管陳紹宗，仲有外幣策略環球主管潘達維等等。
更貼心嘅係，會議係由「CNH（離岸人民幣）係代表境外使用嘅人民幣」開始講起，相信來自印度、杜拜、英國、新加坡等地嘅媒體都對在岸以及離岸人民幣業務了解更多。絲絲聽完佢哋嘅講解後，好似補咗習，基本功厚咗。
CNH匯市發展神速
佢哋話人幣產品以點心債（在港發行嘅人債）市場發展得最快。自從德資Volkswagen人債推出後，逐漸吸引歐資投資者參與市場；另外，CNH匯市發展都好快，每日交易量逾二十億美金。