絲絲講場：梁太孖住「老友」慶中秋
下個禮拜就中秋節啦，絲絲呢排都好忙咁，周圍送啲月餅券畀屋企長輩，唔講仲以為轉行做咗速遞公司！絲絲聽聞恒生（00011）副董事長兼行政總裁梁高美懿（梁太）同絲絲一樣咁有班長者心，喺上個禮拜六招呼咗差唔多200個長者一齊食晏預祝中秋節。
表演山歌龍船舞回禮
潮流興健康，梁太就揀咗特製恒生健康月餅送畀班老友記，班老友記見到梁太咁有心，即席以舞回禮，幾位老友記表演傳統龍船舞，仲改編埋山歌送畀恒生。梁太話，好多謝班老友記咁精彩表演，仲話喺班老友記身上獲益良多。
義工特訓練侍菜技巧
為咗今次個活動，絲絲收到風，超過50個恒生義工接受特訓，苦練侍菜技巧，等班老友記可以盡興而歸，仲特別設計菜式，有松茸珍珠貝燉花膠嘅「珍珠耀滿堂」、大良牛乳炒蝦球嘅「龍馬倍精神」、陳皮雲耳蒸鱈魚件嘅「萬事皆如意」等，聽到絲絲流晒口水，好想參加埋一份添。