港交所（00388）行政總裁李小加今日會喺港交所會議廳，同接近300名經紀開研討會，討論近期業界最關注嘅議題。證券及期貨專業總會會長王國安亦會出席。不過，王國安今次講明會「扮傻仔」，不會搞事，只會聆聽。
今次研討會其實係由李細燕任會長嘅證券學會主辦，除咗該會會員外，亦邀請咗其他證券組織嘅會員參與，初期名額預咗170名，結果有接近300名報咗名，反應非常熱烈。
今日研討會共有7個講題，包括內地「送大禮」措施、交易所籌建數據中心目的、高頻交易會唔會喺香港出現、交易所對黑池嘅看法等。其中李小加會親自講解高頻交易同市場改革部分，其他就由港交所高級管理層講解。
證券及期貨專業總會共有8名理事將會「踩場」，不過王國安同絲絲講，今日部署嘅策略，係無謂硬碰，聽李小加講乜先，不會即場反駁，理性討論。所謂一動不如一靜，最多之後才慢慢回應。
其實有怨言又何止王國安，絲絲收到風，十月交易大堂續租後，如無意外政府會加租，交易所會向出市經紀收回成本。即係有機會加出市經紀租金，難怪經紀咁多聲音！
余絲韻