市場熱線：上藥列入觀察名單

聽日至有德國法院對拯救「歐豬」國的合法性作出裁決，希臘國債十足十「八月十六」才擺賣的月餅一樣，無人想要，執筆時一年期希臘國債息率升到83.2厘，違約幾可肯定是必然的結局。近幾日歐股大插水，似乎股市都打定輸數，要預備為希臘及其他「歐豬」窮兄弟一旦賴債，銀行及經濟體系要幾多銀紙先可以埋到單。

不過，歐洲三大指數尋日早段反彈超過1%，美股尋晚復市未必咁悲，至於奧巴馬聽晚演講係值得「憧憬」抑或「擔心」其實主要睇孖屐氣氛，尋日露口風話搞大型基建去刺激就業，所有領導人都知搞基建係最簡單刺激經濟就業嘅方法，問題係美國咁窮，仲充大頭鬼？

水泥股可以諗諗

香港同祖國都係最叻搞基建，而最開心就係建材股，所以水泥股一路威咗好耐，但呢幾日嘅大屠殺觸目驚心，海螺（00914）、亞泥（00743）同台泥（01136）已跌穿上月低位，最大原因亦係話怕緊縮政策令到基建投資減慢，瑞信更突然大力唱淡，但亦有大行話行業旺季不能睇得太死，博反彈有得諗。

魚缸有波幅，成交金額因此回升到690億元，但沽空亦同步升到82億元，比例冇乜點少到。A股繼續偏軟，但遲收市嘅亞洲魚缸同港股一樣倒升，包括新加坡、泰國同印尼等。尋日恒指靠晒祖國移動（00941）同公用股，學鄭家華話齋，長線基金揸住幾隻收息股，對沖基金狂沽其他，大家都有得搵錢。

油價下跌，兩隻化工股同3隻祖國飛機股都受惠，連思捷（00330）同國壽（02628）亦有反彈。尾市恒指拗腰上，二三線股亦冇咁慘，下跌股數由接近千隻減少到746隻，創新低嘅有百幾隻，較特別係港交所（00388）接到十幾單錯價交易，但全部個價都唔係錯得好離譜，聞說係擺烏龍，重複上板所致。

淡馬錫積極增持

呢排有幾隻藥股走勢好差，包括中國製藥（01093）、聯邦制藥（03933）、神威（02877）等，皆因祖國隔幾個月就要藥企減價，但國藥（01099）同上海醫藥（02607）兩間有做分銷零售嘅公司就有回穩迹象，當然，兩隻股都係高台跳水輸死唔少股民，但家吓有邊隻二三線股唔係咁樣？

上藥招股價23蚊，依家潛水26%，喺半新股來講已唔算特別差，而且跌到16蚊附近好似有唔少買盤密密吸納，最積極嘅肯定係淡馬錫，由上月中開始3度增持咗8球幾，每股作價16.1至16.3元；佢阿媽亦買咗21球，但係買A股（尋日較H股溢價約7%），跟大戶入貨應該唔衰得去邊。

上藥上半年賺多66%，計落預測PE約15倍，平過國藥好多，當然兩隻「晒士」亦唔同，但今時今日買隻PE低嘅股會安全啲。不過，股民最關心嘅係藥品降價令降完未？照計降咗咁多次都應該差唔多，通脹由八月開始會逐步回落，食用油已加價，藥價可望回復穩定。上藥主要靠自然增長同收購去提升盈利，呢個估值已吸引大孖沙入貨，諗住做長線投資嘅股友都可以諗諗。

古勝