貿易通（00536）由上市開始，一直係由香港政府做大股東。
雖然一早話會減持股份，點知都係唔夠滙控（00005）快手，上個禮拜將手持嘅8.1%賣咗，買家係邊個？原來就係貿易通嘅主席李乃熺。
李乃熺喺投資界雖然不算出名，不過喺商會及實業圈就非常有名，事關佢嘅TAL係不少名牌時裝嘅生產商，美國目前所賣嘅名牌恤衫當中，每七件就有一件係由佢生產。
在生意投資上一向獨具慧眼，今次佢把握機會「入主」貿易通，對投資者來說可謂別具意義！
滙控以作價接近八千萬元，賣咗8.1%畀李乃熺後，李乃熺即刻變咗大股東，持股量由4.86%增至12.94%，取代港府成為貿易通嘅第一大股東。
講番政府，佢哋一早講咗會搵財務顧問，睇吓係咪應該出售其持有約12%貿易通，有多名基金投資者主動表示接貨意願。之不過，動作唔夠滙控快，唔知李乃熺有冇興趣買埋政府手貨呢？
據絲絲記得，當年貿易通上市，政府已表明，長遠會減持股份，所以絲絲對佢哋想走貨一啲都唔覺得奇怪。即使政府不再作為主要股東，相信亦不會對公司業務帶來影響。
余絲韻