絲絲講場:國泰賣廣告伙記上陣

員工係公司嘅重要資產,所以好多企業都同員工分享成果,畀番啲適當嘅回報佢哋,但有另一啲方法可以令員工更投入、更忠心。尋日絲絲同國泰航空行政總裁史樂山傾開,佢哋計劃搵員工做廣告主角,絲絲覺得呢個方法幾好,起碼角色扮演方面一定係合適人選,唔會揀錯角。

型男索女任揀

史樂山話,新嘅市務廣告以員工為「公司珍貴資產」作重點,所以用埋員工做廣告主角。其實呢個方法,其他企業都用過,例如用喺公司印製嘅月曆、慈善活動嘅宣傳單張,效果相當唔錯。史樂山話,呢個廣告好快會喺世界各地推出。如果絲絲冇估錯,佢哋搵嘅主角人選,應該嚟自唔同國家,咁至代表到佢哋嘅業務嘛。佢哋嘅員工好多都係靚仔靚女,真係大把有得揀。

長遠計劃大堆

除咗忙於搞廣告之外,國泰嚟緊仲有乜嘢大計?佢一輪嘴咁話,包括搞好新客艙產品及航點、標價2,000億元嘅機隊現代化計劃,未來十年將會引入95架更具燃油效益嘅新飛機,仲有香港國際機場斥資55億元興建新貨運站等。聽落真係好長遠嘅計劃喎!佢哋早輪公布咗,會喺明年第二季起為國泰長、中途客機上,增設「特選經濟客艙」嘅計劃,史樂山叫絲絲記得到時試吓。

余絲韻

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!