各位親愛嘅讀者，今期搞搞新意思，邀得早前留學德國的靚女舊同事Baby客串，就容我「蛇」一次吧！（大健）
久別讀者剛好兩年的Baby很榮幸回歸，一期專欄咁多喇。「整個場面我hold住了！」不單是「hold住姐」（在台灣綜藝節目表演「比堅尼變格格」一炮而紅）所講的，亦都係美國總統奧巴馬嘅心聲。
奧巴馬今個禮拜四講嘢，預計佢會公布一系列刺激就業嘅措施，奧巴馬要hold住美國個爛場，真係好高難度，反而投資者真係要hold住，唔好衝動入市，因為市場等緊今個月中下旬聯儲局一連兩日嘅議息會議，睇下主席伯南克出咩板斧救市。
最近Baby收到張相，主角係伯南克，得番條底褲着嘅伯老，大家都叫佢慳啲，佢着緊嘅只係一件唔存在嘅「國王的新衣」。在Jackson Hole無公布，但佢將全球期望同視線押後兼轉移兩個禮拜，身為央行行長，管理市場期望唔係新招，醜婦終需見家翁，就睇佢拖得幾耐！
今個禮拜日係美國「911」十周年，最新一期《經濟學人》就用雙子塔做封面，忘了，忘不了。「911」係歷史重要嘅一頁，花旗國經歷了政治經濟動盪嘅十年，係重要嘅十年，期間可能已經出現「十年美金變爛銅」嘅轉捩點。
套奧巴馬講過嘅「美國永遠係AAA」，又或者股神巴菲特形容為AAAA，喺別無他選下，美元和美債真係無可取代。不過，認為美國會死或已死嘅人愈來愈多，唔只央行，好多人都已靜悄悄買多咗非美元資產。
BABY