孖妹缸湖遊：建行VS滙控絕對夠秤

陸東係建行同招行（03968）嘅粉絲，年頭佢講過：「內地銀行簡直就係世界第一流嘅銀行，佢哋一啲都唔蛋散。」不過好無奈，八月港股受外圍因素影響，再加上地方債問題，拖累內銀股表現「甩皮甩骨」，不過睇番最近內銀股中期業績又唔錯喎！建行中期純利賺近930億元人民幣；相反，滙控中期業績純利只係賺得89億美元（折合約694億港元），兩者比較之下有啲距離！究竟散戶應該點樣理解「建行變滙控」？孖妹搵到同呢兩隻股票甚有淵源嘅朋友仔探討吓。

莊：致富證券資產管理部聯席董事　莊志豪

建設銀行總部	（左）致富證券資產管理部聯席董事　莊志豪 （右）專欄作家散戶「博客」 王 市場先生	受外圍市況帶動，恒指在周二（30 / 8）收市重上二萬關口，突破了過去七日在19,000至20,000點間的波動區域。你認為港股跌定未？

歐債爆煲滙控恐見$38

高妹：你喺滙豐工作過，之後再轉工去致富證券，其後建行來港上市，你就即刻月供建行股票，你同呢兩間銀行咁大淵源，你點睇「建行變滙控」呢？

　莊：以建行嘅盈利增長動力，佢一定有機會做另一隻滙控，不過我唔敢講定個時間表，始終建行係內地國有商業銀行，主要股東係中央政府，其業務發展及營運方面會受到一定程度限制。簡單啲講，建行嘅大股東係中央匯金投資，而滙控嘅股東就係環球投資者，前者喺業務策略及營運上需要跟隨國策計劃，進取性及靈活性會較低，而滙控係一間環球規模性銀行，決策相對較靈活，好似依家歐美經濟唔掂，佢哋好快就決定裁員三萬人，但內地銀行點會話炒人就炒人呀？

高妹：咁我都明白，建行同滙控嘅背景上係有唔同，不過建行賺錢能力唔弱架，佢嘅中期業績仲好過滙控多多聲喎！

　莊：呢個成績好正常，咁滙控係國際性銀行，現時歐美經濟咁差，一定拖累佢嘅盈利收入；而建行嘅經營網絡主打亞洲地區，一方面得益中國經濟增長，另一方面又唔使負擔歐美債務問題，盈利收入自然好。不過，如果建行要變成滙控，基本條件係佢嘅股東股權需要開放，等買賣變得更加市場化。另外，人民幣自由兌換，亦係幫助建行走出去嘅其中重點，有助其發展同業務更加環球化。

高妹：咁即係依家散戶應該買建行長揸，而唔好再買滙控？

　莊：我暫時停咗月供建行，等遲少少內銀股勢頭好啲先至再供番；至於滙控，歐美債務問題絕對會影響佢嘅盈利表現，所以佢都結束咗俄羅斯及荷蘭嘅零售銀行業務喇。另外，我覺得歐債危機好大機會爆煲，如果遲啲美國再推QE3（第三輪量化寬鬆），甚至與歐盟同步救市，呢啲對市場只係暫時性止痛藥，甚至加深歐美問題嘅後遺症，我相信當歐債爆煲，滙控股價跌返落38蚊都有可能。其實現時入市炒股真係好危險，所以我都揸人民幣同黃金為主。

市：專欄作家、散戶blog王––市場先生

建行市帳率較滙控高

祺祺：你係滙控粉絲，對佢一直「不離不棄」，同時你有入建行，你又點睇？

　市：滙控股價係由幾蚊開始升上過百蚊，但建行就無可能重複呢個情況，其股價要連升兩倍都無咩可能。一般而言，環球銀行股嘅PB（市帳率）介乎2至2.5倍，現時建行及滙控嘅PB分別係1.68倍及1.05倍，可見建行已較滙控優勝，但咁樣唔代表佢哋股價會一樣。另外，如果你用市值規模去比較，建行亦都超越咗滙控，我認為建行喺5蚊算係平，6蚊以上亦唔算貴，但8至9蚊就真係升得算好盡喇！早前，建行跌到5蚊邊，我都有再入貨。

祺祺：照你咁分析，其實建行已經變身成為另一隻滙控喇喎，之不過佢無喺股價上反映出來。

　市：喺某啲基本因素上，我認同呢個講法。其實每個地方都有其龍頭地位嘅銀行，喺內地建行處於主導地位，業務亦十分賺錢，但當佢離開咗自己嘅勢力範圍，情況就會變得唔同。以花旗為例，佢曾經係全球市值最大嘅銀行，但佢喺香港或者新加坡嘅發展及盈利規模都唔算好大，原因就係呢兩個地方都有自己本身佔有龍頭地位嘅銀行，花旗點同人哋爭市佔率呢？所以我唔覺得建行拓展海外，最終會換來好大利益，佢反而繼續主攻內地仲好。

祺祺：有道理！咁你點睇佢哋嘅前景呀？

　市：現時歐美債務問題令銀行股的確處於低潮時期，而且市場對佢哋嘅監管條件愈來愈苛刻，短期股價難以有明顯性扭轉。不過，如果你相信經濟會有復甦一日，我覺得大家可以投資銀行股。國際性銀行方面，我仍以滙控為首選；而內銀股，我就揀建行同農行（01288），前者業務及盈利增長穩定，派息不俗，後者因為過往經營效益低，改善空間會較大。

高妹、祺祺

若有料報畀高妹同祺祺或有嘢問，可電郵money.biz@opg.com.hk