絲絲講場：維他奶少息股東無詐型
維他奶（00345）嘅小股民數目唔少，所以一年一度嘅股東大會都人頭湧湧，趁機同管理層交流溝通吓，但尋日個股東會足足開咗一個鐘，莫非好多小股東好唔滿意今年冇特別股息派？非也，主席羅友禮話小股東不知幾體諒公司嘅決定！
絲絲翻查番啲紀錄，原來維他奶由○三年開始，連續咁多年都有派特別息，證明「與小股東分享成果」唔係得個講字。
三大項目在在需財
羅生話，小股東並冇趁機詐型，自己亦都有解釋今次做法。佢話公司派息比率一直維持五至六成嘅水平，但因為公司有澳洲、香港及內地產能擴張等三大投資項目喺手，所以今年需要投放較多資金，仲話小股東好體諒公司將特別股息嘅資金用來拓展業務，相信三至五年後就係收成期，咁幾時再派特別股息？咁就要睇發展進度喇。
為對抗成本上升，維他奶年初已經加咗價，羅生話嚟緊如果成本仲不斷升，都唔排除再加價。至於舊年維他奶七十周年嘅宣傳活動搞得好出色，羅生就話其實不斷都會對品牌包裝進行創新，帶畀大家新鮮感，遲啲更有可能請埋代言人喎。
余絲韻