市場熱線：維達等回吐至買

朝早挾上有幾個原因勉強解釋，道指隔晚升53點而亞洲時段期指再升，奧巴馬下個禮拜公布刺激經濟同就業措施，祖國PMI重上50樓上，但朝早拿拿臨挾440點未免太過誇張，當時較上周五收市已飆升近1,400點，好似趕住投胎盡早完成反彈目標，然後即日殺落，差啲仲變埋單日轉向，國指亦倒跌，成交增至871億元。

阿伯睇怕無計可施

呢排美股炒緊救市，奧巴馬口響響話要創造過百萬個職位，但水從何來？唔減財赤可能會再被降級。而阿伯玩神秘其實係冇計，息率同失業率及通脹掛鈎正一阿茂整餅，乜美國仲有減息空間咩？上次搞咗個兩年唔加息去安撫市場，證明已經冇「蕉」可用。就算祖國通脹咁高，但已冇條件加息，巴西甚至減返轉頭添，可見經濟情況幾咁嚴重。

另一方面，歐元區公布的經濟數據，差得嚇死人，八月歐元區製造業採購經理指數（PMI）終值得49，是兩年來首次跌穿50水平，再睇其他歐洲國家數據，英國（非歐元國）及意大利八月份PMI，分別創○九年六月及八月以來新低，去到49及47，法國亦由50.5跌至49.1，統統低於50，意味製造業由擴張進入萎縮，依家美國人正等緊總統奧巴馬，下星期拋出新刺激經濟方案，歐債危機才為稍為平息，幾個強國經濟數據差成咁，令人擔心歐債危機又會成為下一輪淡友的做市藉口。

港股尋日主要係炒落後，連業績唔好嘅北控（00392）、上實（00363）、中鋁（02600）、東風（00489）都翻生。祖國又要藥品減價，但可能孖屐早已消化呢個消息，藥股尋日表現唔錯，神威藥業（02877）升8.27%，龍頭股國藥（01099）升5.5%。而A股炒肥田料股，中化肥（00297）同中海石化（03983）都表現唔錯。

至於消費股亦受惠祖國減稅，華創（00291）、聯華（00980）、銀泰（01833）及百盛（03368）等百貨超市股均升4%咁上下，最勁係「田雞王子」（01259）升6%。古勝介紹吓較冷門嘅寶勝（03813）同寶峰（01121），前者下個禮拜派成績表應該唔差，而後者有「拖鞋王」之稱，近年做自己牌子，所賺已超過OEM業務，今年預測PE只係5倍左右。

祖國移動（00941）同粵投（00270）呢排都好勁，假設經濟轉差，除咗公用股有乜好買呢？古勝諗起維達（03331）同恒安（01044），因為廁紙同衞生巾都係必需品，經濟唔好紙漿價格下跌，更加有利兩間公司降低成本壓力，佢哋上半年就係因為紙價貴，搞到成績表出現倒退，但孖屐已係預咗，所以股價不跌反升。

兩隻股比較之下，維達舊年已賺少7.3%，今年上半年賺少4%已係「進步」表現，連恒安呢隻龍頭都要倒退，惟有寄望下半年有運行，暫時睇都幾樂觀，因為到目前紙漿價格已比高位回落唔少，假如一路跌落去，隨時全年成績表有高增長添。

受惠紙漿價格回落

維達下半年有兩間新廠房投產，年產量將增至47萬噸，三至五年後會升到70萬噸，產能增長加埋毛利率復甦，隻股自年初開始已處於上升軌，今年餘下時間仍有望跑贏大市。維達PE較恒安低，喺呢種市況，不妨等股價出現回吐先至買。

古勝