絲絲講場：王浵世靜極思動 任東方明珠非執董
資深銀行家王浵世退休後，最大嘅「工作」係寫書，東方明珠（00632）公布中期業績之際，仲公布埋委任咗佢做獨立非執行董事，以及審核委員會及薪酬委員會成員，享有董事袍金每年30萬元，亦有權收取認股權證及酌情年終花紅。絲絲記得佢過去三年都冇做過上市公司職務，今次都算係個開始。
出書傳授管理藝術
絲絲認識王浵世嘅時候，佢喺滙豐銀行，做過滙豐銀行中國業務總裁，協助滙豐喺中國建立規模最大嘅外資銀行，仲做過滙豐銀行美國西岸業務總裁。到咗○六至○九年，出任民生銀行（01988）行長，係首位出任內地全國性銀行總行行長嘅香港銀行家。加加埋埋，佢嘅銀行業經驗，應該有36年。民生去香港上市前，佢已經離開咗。
近年佢勤於寫書，淨係今年都出咗兩本，內容離唔開佢喺銀行咁多年嘅經驗，同埋管理藝術，絲絲已經拜讀過，期待佢出第三本。
余絲韻