大陸身家過億嘅有錢人愈來愈多，佢哋穿金戴銀身份咁矜貴，當然要幫自己買番啲保障啦，咁就令內地保鏢行業忽然吃香。最近中國第一屆「國際要員保護特訓營」就訓練咗四十二個「頂級保鏢」出嚟，據聞平均年薪仲超過二十八萬人仔，最貴嗰個年薪仲成八十萬喎！梗係啦，搵命博會死人o架！
保鏢咁好搵，咁究竟除咗好打仲要咩條件先入得行呢？絲絲聽講原來大陸揀保鏢唔係要求高大靚仔，好似成個Ｇ４馬德鐘嗰種，最好就係平平凡凡容易混喺人群嗰類。聽落好似好簡單，原來仲要做埋秘書嘅嘢，要識兩文三語。
絲絲仲打聽到，「頂級保鏢」嘅畢業生要學過以色列國際安全學院嘅要員保護課程、特種駕駛、ＦＢＩ讀心術、偵察技考、商務禮儀等等。嘩，咩都識，怪唔得年薪咁貴啦！
根據中國保安協會嘅數據，依家中國有安保服務提供嘅企業有近三千家，從業人員成三百五十幾萬，而大陸最專業嘅私人保鏢公司仲已經搞緊上市呢！
余絲韻