市場熱線:上海石化雙底回升

港股維持一日升、一日跌嘅模式,另外月尾例升亦冇甩拖,古勝稱之為「輸家食尾胡」,但月尾上升唔代表下個月會有轉機,上兩個月咪一樣升完再跌!今日就期指結算,如果繼續單跳,今日即係要跌,但要估短期魚缸表現盞攞苦嚟辛。九月又係要睇住阿伯,故弄玄虛開多一日會,但一味出口術都唔係辦法,其實有招數就一早出咗,收收埋埋梗有難言之隱,一係採拖字訣,一係招數屬「七傷拳」,打傷人自己更傷。

今個禮拜暫時要睇住美國經濟數據先,而上個禮拜突然傳德國3條煙不保,照計德國真金不怕洪爐火,空軍咁做都係試水性質,但竟然DAX嚇到大跌,證明乜嘢叫人心虛怯,空軍隨時會發動總攻勢,穩陣股友最好靠邊站,所以尋日成交再縮到得532億元,恒指升282點只係乾升,咁細成交再挾上兩萬點樓上唔係難,古勝會選擇忍手。

內銀H股升因牽強

港股尋日離奇在靠內銀股挾高,傳聞美銀將沽貨嘅建行(00939)升近5%,工行(01398)同中行(03988)亦分別升3.25%同2.65%。人行證實改變RRR計算公式,等同變相加兩至三次RRR,有人話調整之後唔使再驚加息,但內銀H股升因仍好牽強,滬綜指就被內銀A股拖累而跌1.37%。今次收水,細錢莊會較受影響,民行(01988)大跌6%,但做中小企放水生意嘅中國信貸(08207)乘勢上升6%。

太保(02601)業績好,更顯得國壽(02628)特別差,結果國壽再插3.44%,隻股愈插就愈多ELN接貨,形成惡性循環。尋日雖然係升市,但仍有超過400隻股票下跌,77隻股票創52周新低,有啲公司愈睇愈傷心,例如霸王(01338)同金風(02208),但後者A股仍高過H股兩倍幾價錢!飛克(01998)同博士蛙(01698)亦喺派完成績表後暴跌,呢幾隻都係近兩年上市嘅股票,古勝成日話近年至上市嘅公司多數係籮底橙,呢樣可以用成績表去印證。

中石化(00386)業績後勁升6.7%,上海石化(00338)同儀征(01033)亦升超過5%,兩個仔幾時私有化講咗咁多年,等到頭髮變白都未得,不如睇番佢哋嘅基本因素仲好過。上石同儀征往績PE都係6倍,前者倒退、後者有增長,好似儀征抵買啲,但儀征業績好係因為棉花價格高帶挈,呢支歌仔下半年已冇得唱。上石雖然賺少6%,但隨住油價回落,煉油業務嘅毛利率有望改善。

間中炒番轉私有化

國際油價喺第二季曾升至過百美金一桶,但中央一味加慢減快,搞到煉油業蝕大本,依家油價回復正常水平,上石下半年應有望回復增長。而隻股有另兩樣催化劑,一樣係講咗好耐嘅成品油定價機制改革,另一樣係私有化,私有化一路煲冇米粥,但隔一排就攞出來炒一炒。上石喺舊年二月同五月都曾跌到過2.6元附近之後回升,今個月亦係下試呢個位然後反彈,最主要原因係PB低過1倍就有人憧憬私有化,既然有個「底」,買入都唔使心慌慌!

古勝

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!