絲絲講場：陳啟宗一扇三用
恒隆地產（00101）喺內地第四個項目，尋日就喺出名「名仕多」嘅濟南開幕，絲絲見到呢個恒隆廣場又大又多嘢睇，即刻眼睛發光，心入面即刻彈咗十個like出嚟，點知恒隆老闆陳啟宗（洋名Ronnie）話有啲地方唔係幾好，嘩，咁大劑，原來佢嫌間間食肆都要大排長龍喎！
濟南恒隆廣場開幕
咪以為Ronnie咁講，你就估個場唔夠食肆，其實七層樓入面每層都有幾間，雖然佢哋揀尋日星期五開幕，不過就絲絲所見嗰度都真係幾多人。絲絲覺得Ronnie好鬼馬，其實佢讚緊個場人流勁至真。Ronnie自己都話，第一日想做到20萬人流架！
濟南天氣無香港咁悶熱，但係考慮到個開幕儀式日光日白喺戶外進行，所以，佢哋一早預備咗每人一支水、一把紙扇，紙扇上面仲印上濟南恒隆廣場嘅全貌，一方面為一眾來賓帶來涼意，而且紙扇既有中國特色之餘，又收到賣廣告之效，真係一「扇」三用呀！你睇Ronnie揸住把扇係咁搧，就知幾有用啦！
余絲韻